ماہنامہ عبقری - اکتوبر 2010ء

ہر ماہ توحید و رسالت سے مزین مشہور عالم کتاب کشف المحجوب سبقاً حضرت حکیم صاحب مدظلہ پڑھاتے ہیں‘ قارئین کی کثیرتعداد اس محفل میں شرکت کرتی ہے۔ دو گھنٹے کے اس درس کا خلاصہ پیش خدمت ہے۔ (آئندہ حلقہ کشف المحجوب 10 اکتوبر بروز اتوار کو ہوگا) دنیا مومن کیلئے قید خانہ ہے۔ مزاج ولایت یہ ہے کہ دنیا کے عارضی دکھوں کی بجائے آخرت کی ہمیشہ ہمیشہ کی زندگی کے دکھوں کا مداوا کرتے ہیں۔ اس لیے اولیاءکی باقیات عمارتوں اور محلات کی شکل میں نہیں ہوتیں بلکہ انکی تعلیمات اور کردار کی شکل میں زندہ رہتی ہیں۔پیر علی ہجویری رحمتہ اللہ علیہ فرماتے ہیں کہ جس کام میں نفس کی طمع شامل ہوجاتی ہے اس کام میں سے برکت اٹھ جاتی ہے۔ شیخ نے اس کتاب کی پہلی بنیاد ہی نیت پر رکھی ہے اور اللہ کی مدد چاہنے کے بعد سب سے پہلے اپنی نیت کو ٹٹولا ہے۔ فرماتے ہیں اس نفس کی فریب کاریاں ایسی ہیں جو ظاہر نہیں ہوتیں اور یہ اس طریقے سے دھوکے میں ڈالتا ہے کہ خود بندے کو احساس بھی نہیں ہوتا جس کا نقصان یہ ہے کہ دل سیدھے راستے سے ہٹ کر غلط اور ٹیڑھے راستوں پر لگ جاتا ہے۔ فرماتے ہیں میں نے مخلصین کے کہنے پر اسرار الٰہی اور معرفت الٰہی پر مشتمل اس کتاب کو لکھنے کا ارادہ کیا اگرچہ میں اس کا مکمل حق ادا نہیں کرسکتا لیکن اس کو ادا کرنے کی کامل نیت ضرور کرتا ہوں کیونکہ جب کسی کام کو اچھی نیت اور خلوص کے ساتھ کرنے کا ارادہ ہو اور اس میں کچھ کمی رہ بھی جائے تو بندے کی نیت کی وجہ سے اللہ رب العزت اس کمی کوتاہی کا ازالہ فرمادیتے ہیں اور جو کام بغیر نیت کے کیا جائے اگرچہ مکمل اور احسن کیا جائے اس کی بارگاہ الٰہی میں کچھ اہمیت نہیں اور اس کی تائیدحدیث مبارکہ سے بھی ہوتی ہے۔ اس کی مثال یوں ہے جیسے کوئی شخص اگر روزے کی نیت کے بغیر بھوکا رہے توکچھ ثواب نہیں ملے گا خواہ جتنی دیر بھی رہے۔ نیت کا معاملہ اندر ہی اندر ہوتا ہے اس کا اثر بظاہر ظاہر نہیں ہوتا۔ فرماتے ہیں راہ حق پر چلنا ہر شخص کے بس میں نہیں اس پر وہی چل سکتے ہیں جن کا انتخاب بارگاہ الٰہی میں ہوجائے۔ پچھلا صفحہ